2016年12月20日 星期二

懷孕禁忌之我見

古時,女人生仔,差不多等於在鬼門關前徘徊;現今,雖然醫術昌明,但女性懷孕仍然是高風險的一件事,以致枕邊人、家人都變得非常緊張,呢樣唔可以做、嗰樣唔可以做。今日,就不如講下Un太對咁多懷孕禁忌的應對方法及個人見解。
15-1

飲食篇:

相信不少人知道自己懷孕,第一次事應該係google有咩食得有咩唔食得。因為好多長輩會話,要食多啲白色野,小朋友先會白白雪雪;又話食咗乜乜乜,小朋友出世會敏感,皮膚會差云云‧‧‧
首先,寶寶會不會過敏,膚色的白唔白,都是精子與卵子結合那時候就決定了!即係話,基因太於一切!唔關阿媽事 X 1000次!更加重要係,基本上人吃得嘅食物,孕婦都可以吃!(唔計藥物或毒品)
Un太以前都算係半個咖啡精(但只飲Americano),但懷孕後都有聽從中醫的指示,戒掉咖啡、連奶茶都飲少咗好多。因為中醫師講過,咖啡會影響鐵質吸收,長遠計對身體有害,即使係平常人,咖啡都要少飲,更何況孕婦!Un太認為如果可以,備孕時就應該戒,因為到有咗先戒好痛苦。
至於生冷野,好多人視佢為毒品,如西瓜、雪糕、凍飲,認為會造成早產,甚至小產。其實係沒有無科學根據!營養師講過,西瓜係可以食,但每日只可以食切粒一碗,因為西瓜超高糖,但對胎兒無直接影響;雪糕、凍飲都係同一道理,再加上如果處理程序稍有問題,孕婦吃後會不舒服、甚至出現瀉肚子,所以就最好暫時避免食用。不過都係嗰句,對胎兒絕對無影響的。
但對於刺身、未煮熟的雞蛋,Un太就真係好自律,無食過!因為刺生呢類生冷野,就算6星級酒店都好難保證衞生水準,陣間食咗中招導致肚痛、肚瀉,好易引致胎兒作動早產。
其他水果蔬果,除了「馬齒莧」外,恒常可以在街市買到的Un太都會食,當然要經常轉換款式,而且份量不能太多,水果每日1-2份就足夠。好似莧菜咁,Un太都會食,但每次都唔會食多過半碗,或者會同一餐有2款菜,讓身體吸收不同的營養。

運動篇:

記得健康院姑娘講過,懷孕頭三個月及尾三個月,都不適宜游泳,原因是怕游泳時穿羊水發現唔到,以及怕比人踢到肚而危及胎兒。而懷孕中間三個月游泳其實問題不大,Un太的中醫師都講,游泳只要適宜不要太攰,都是可以進行的。
近年都好興的孕婦瑜珈,Un太就未試過亦唔打算試,因為一直沒練開,而且個人認為市面上好多瑜珈教練對懷孕期女性的保健常識所知不多,為免練習不當導致,情願唔試。

起居篇:

好多長輩會禁止孕婦舉手過肩,話會導致流產或者早產。現代啲嘅講法,其實係怕孕婦經常舉高手取物件,會重心不穩而發生意外,但舉高手呢個動作,本身不會導致子宮下垂,亦不增加早產風險。
家務方面,Un太其實一路都有做,但一定要分階段做,做到累就立即休息。暫時來說,做得最多的家務係煮食+曬衣服+整甜品‧‧‧
至於行樓梯可以助產,Un太的中醫師就話唔好,因為怕肚太大容易跌倒,只需要每日落街走動,行平路已經足夠。

個人衛生篇:

最後一樣亦係最多人忽略的,就係牙齒健康!不少證據顯示,嚴重的牙周病孕婦生出早產兒的比例為健康者的 2.8倍,不容忽視!30-50%的早產可以歸因於感染的原因,而牙周病本身就是一種低度的感染。所以Un太一踏入第四個月時,就已經迫不及待去洗牙,當時連牙醫都讚我做得岩,因為懷孕中期是最適合做牙齒保健,大家記住備孕時或懷孕中期點都要去檢查牙齒最少一次,亦記住要經常保持牙齒清潔。
【Main Blog: https://educatemybaby.com/ 】
(電郵:nataliepuipui@gmail.com)
(Facebook: Un太的Blog)
(微博: NatalieUn)
(Instagram: @natalie_cyp)
Related Posts Plugin for WordPress, Blogger...